ताजा अपडेट

‘गोरे’को खुलासा– नेपालमा हुने सुन तस्करीमा दाउदको कनेक्सन

          |   396 Views   |   Published Date : 23rd May 2018 |

w

काठमाडौं– सुन तस्करी र सनम शाक्य हत्यामा पक्राउ परेका चूडामणि उप्रेती ‘गोरे’ले नेपालमा हुने सुन तस्करीमा कुख्यात अन्डरवल्र्ड डन दाउद इब्राहिम  समूहको समेत संलग्नता रहेको बताएका छन्। गृह मन्त्रालयको विशेष अनुसन्धान समितिलाई दिएको बयानमा उनले यस्तो बताएका हुन्।

गोरेलाई समितिले मंगलबार पक्राउ गरी सार्वजनिक गरेको थियो। सार्वजनिक गर्नुअघि भिडियोमा उनको बयान रेकर्ड गरिएको थियो। बयानमा उनले आफू सुन तस्करीको व्यवस्थापक मात्र भएको र मुख्य लगानीकर्ता दाउद समूहसँग मिलेको बताएका हुन्। समितिको अनुसन्धानमा दुबईबाट एक समूहले सुन पठाउने गरेको पाइएको छ। दुबईलाई दाउदको आधारभूमि मानिन्छ।

स्रोतका अनुसार, गोरेले सुन तस्करीमा ५ जना मुख्य लगानीकर्ता भएको बताएका छन्। मोहन अग्रवाल, भुजुङ गुरुङ, डा डेविड भन्ने छिरिङ घले नेपालका मुख्य लगानीकर्ता भएको उनको भनाइ छ। यसका साथै तस्करीमा दुई भारतीय व्यापारीको पनि लगानी रहेको उनले बताएका छन्। जैन भनिने कोलकाताका एक व्यवसायी र उनका साथीको विवरण गोरेले समितिलाई दिएका छन्।

‘उनीहरु दाउदकै मान्छे हुन्’, बयानमा उनले भनेका छन्, ‘धेरैजसो सुन उनीहरुले नै भारत लैजाने गर्थे। नेपालमा त यसको बजार नै छैन।’

सुन तस्करीमा दुबईदेखि नै दाउद समूहसँग सम्पर्क रहेको गोरेको दाबी छ। विमानस्थलबाट भित्रिएको करिब ३८ सय किलो सुन दुबईबाटै आएको थियो। दुबईबाट सुन पठाउने हरिशरण खड्काको पनि दाउदको समूहसँग सम्बन्ध रहेको सूचना उनले प्रहरीलाई दिएका छन्। खड्का लामो समयदेखि दुबईमा बसेर सुन र हुन्डीको धन्दा गर्दै आएका छन्। उनी गत वर्ष सिआइबीले बरामद गरेको साढे ३३ किलो सुनका पनि फरार अभियुक्त हुन्।

अनुसन्धान समितिका संयोजक ईश्वरराज पौडेल गोरेले थप केही सूचना दिएको र त्यसमा अनुसन्धान भइरहेको बताउँछन्।

अनुसन्धान समितिका अनुसार, समूहले पछिल्लो ५ वर्षमा ३८ सय किलो सुन तस्करी गरेको थियो। त्यसमध्ये ८० प्रतिशत सुन भारत जाने गरेको थियो।

‘सुनको पैसा पनि धेरैजसो भारतबाटै हुन्डीमार्फत दुबई जाने गरेको देखिन्छ’, स्रोत भन्छ, ‘गोरेको बयान र केही तथ्यहरु हेर्दा दाउद समूहका व्यक्तिहरु यसमा आबद्ध नहोलान् भन्न सकिन्न।’

अनुसन्धान समिति समक्ष गोरेले सुनमा आफ्नो लगानी नभएको दाबी गरे पनि उनको पनि तस्करीमा थोरै लगानी हुने गरेको प्रहरी अधिकारीहरु बताउँछन्।

दुबई पुलिसको जागिर छाडेर पहिले पनि तस्करीमा 

यो समूहमा आबद्ध हुनुभन्दा पहिले पनि गोरे सुन तस्करीमा संलग्न रहेको खुलेको छ। पहिला आफूले थोरै परिमाणमा सिंगापुर समेत पुगेर सुन तस्करी गर्ने गरेको उनले बताएका छन्।

पछि गिरोहमै आबद्ध भएपछि उनले अन्य युवकहरुलाई समेत भरियाका रुपमा प्रयोग गरी व्यवस्थापकको भूमिका खेलेका थिए। त्यसमा आफू पनि लगानी गर्ने र प्रहरीसँग पनि सेटिङ मिलाउन थालेका थिए।

विमानस्थलको सेटिङबारे भने सबै भुजुङ गुरुङले मिलाएको उनले बताएका छन्। गुरुङले विमानस्थलका धेरै प्रहरी र एयरलाइन्सका कर्मचारीसँग सेटिङ मिलाएको उनको भनाइ छ। प्रहरीसँगको लिङ्कबारे फरार रहेका छिरिङ घलेलाई समेत थाहा भएको उनको दाबी छ।

दुबई पुलिसमा भर्ना भएका गोरे त्यहाँ जागिर छाडेर सुन तस्कर समूहसँग नजिक भएका थिए। सुरुमा उनी गहनाका रुपमा थोरै मात्र सुन ओसारपसार गर्न संलग्न हुनेगरेको खुलेको छ।

‘सुन भुजुङले नै लुटेका हुन्’

गोरेले माघ ९ गते भुजुङ गुरुङकै समूहले सुन लुटेको दाबी गरेका छन्। केही समययता मोहन अग्रवाल र गुरुङबीच मनमुटाव भएकाले उनीहरुले नै सुन लुटेको उनको दाबी छ। थाई एयरलाइन्सका कर्मचारी सानु वनले गोरेलाई दिनका लागि विमानस्थलबाट लिएर गएको सुन पुरानो बानेश्वरमा लुटिएको थियो। वनको विमानस्थलमै गाडीको ठक्करबाट मृत्यु भइसकेकाले सो घटना रहस्यमय छ।

गोरेलाई मंगलबार बिहान चावहिल गौरीघाटबाट पक्राउ गरिएको अनुसन्धान समितिले जनाएको छ। उनलाई मंगलबार नै मोरङ जिल्ला अदालतमा उपस्थित गराइएको छ। उनको बयान बुधबारदेखि सुरु हुनेछ।

पक्राउ पर्नुअघि उनले मुद्दालाई प्रभावित गराउन आफू असुरक्षित रहेको भनेर आफन्तमार्फत सामाजिक सञ्जालमा भिडियो सार्वजनिक गर्नेदेखि मानवअधिकारवादी संगठनहरु समेत गुहारेका थिए।

Facebook Comments








Leave a comment

Your email address will not be published.


*


गणतन्त्र दैनिकद्वारा सञ्चालित गणतन्त्र अनलाइन डट कम डट एन पी, घोराही, दाङ पत्रिकाको सम्पादक/प्रकाशक : सविन प्रियासन अनलाइन सम्पादक:दीपक जीएम
इमेल :
daily.ganatantra@gmail.com फोन नम्वर : ०८२–५६१९०८, ९८४७८२५४५१