बझाङ, फागुन २६ – अछामका पत्रकार खकेन्द्र नेपालीले सामाजिक सञ्जालमा सुसाइड नोट लेखेर आत्महत्या गरेको हप्ता दिन नपुग्दै बझाङमा पनि त्यस्तै घटना दोहोरिएको छ ।

फेसबुकमा उस्तै प्रकृतिको सुसाइड नोट लेखेर बझाङका रेडियो पत्रकार गोविन्द बोहराले आत्महत्या गरेका छन ।

शुक्रबार साँझ आफ्नो फेसबुक वालमा आमा बुवालाई सम्बोधन गर्दै आत्महत्या गरेका छन् । बोहरा शनिबार बिहान काठमाडौंको सुन्दरीजलमा झुण्डिएको अवस्थामा फेला परेका थिए ।

प्रशारणको तयारीमा रहेको रेडियो केदारको कोषाध्यक्ष तथा कार्यक्रम सञ्चालक रहेका बोहरा यसअघि बझाङकै रेडियो सेतीमा कार्यरत थिए । रेडियो स्थापनाकै सिलसिलामा २ महिनाअघि काठमाडौं गएका बोहरा काठमाडौंबाट सञ्चालन हुने आहाखबर डटकम अनलाइनमा  पनि काम गरिरहेका थिए ।

बझाङ घर भएर काठमाडौंमा  पत्रकारिता गरिरहेका  प्रताप वलीको डेरामा सँगै बस्ने गरेका बोहरा केही दिन यता आर्थिक समस्याको कारणले तनावमा रहेको ओलीले बताएका छन । शुक्रबार दिउँसो १ बजे तिर कोठाबाट बेपत्ता भएका बोहराले साँझ ८ वजे तिर आफ्नो मोबाइलमा म्यासेज लेखेर आफूले आत्महत्या गर्न लागेको भनेर खबर गरेको ओलीले बताएका छन ।  बोहराका श्रीमती र २ वर्षका १ छोरा छन् ।

बोहरालाई बचाउन सकिन्थ्यो

बोहराले आत्महत्या गर्न लागेको म्यासेज गरेपछि ७ बजे तिर आफूले प्रहरीलाई खबर गरेको प्रताप वलीको भनाई छ । प्रहरीले उनको मोबाइलमा फोन गर्दा सम्पर्क भए उनले फोन उठाइरहेका थिएनन ।

‘मोबाइल र फेसबुक चलेको आधारमा उनको लोकेसन पत्ता लगाउन मैले विभिन्न ठाउँमा प्रहरीलाई खबर गरे’ वलीले भने, ‘प्रहरीले अदालतको आदेश बिना उनको मोबाइल ट्रयाक गर्न नमिल्ने भनेर पन्छिए । राति ११ बजेसम्म फोनमा सम्पर्क भैरहेको थियो । ११ बजे तिर अफ् भयो’ तत्काल लोकेसन पत्ता लगाउन सकेको भए उनलाई बचाउन सकिन्थ्यो ।